Pasqyrat financiare të Bashkisë Dibër për vitin 2025 nuk pasqyrojnë saktë pasurinë e saj, sipas Kontrollit të Lartë të Shtetit.
KLSH shkruan se pasqyrat financiare “nuk paraqesin në mënyrë të drejtë disa elementë” dhe se mangësitë “janë materiale por jo të përhapura”. Shkaku kryesor është se llogaritë 210, 212 dhe 213, pra toka, ndërtesat dhe rrugët e rrjetet, “janë pasqyruar për vlerën kontabël pa u krahasuar me inventarin fizik”.
Në regjistër toka paraqitet vetëm 28.4 milionë lekë, sepse nuk është pasqyruar “vlera e truallit nënobjekt dhe të truallit funksional, të shkollave, kopshteve, konvikteve, godina e Bashkisë dhe ndërtesat që ndodhen në Njësitë Administrative”. Në llogaritë e ndërtesave dhe rrugëve, kostot e rikonstruksionit, mbikëqyrjes dhe kolaudimit nuk i janë shtuar vlerës së objekteve. Mbeten të paanalizuara sipas objekteve 135.9 milionë lekë në llogarinë 212 dhe 41.3 milionë në llogarinë 213.
Inventari fizik është bërë vetëm për materialet, inventarin e imët, makineritë, mjetet e transportit dhe inventarin ekonomik. KLSH paralajmëron se mungesa e inventarizimit të plotë “nuk siguron evidencë të mjaftueshme mbi ekzistencën, gjendjen, përdorimin dhe vlerën e aktiveve”.
Një shumë e madhe mbetet e pazgjidhur nga auditimi i mëparshëm. Në llogarinë 213 figurojnë 86 artikuj të rrjeteve të ujësjellës-kanalizimit me vlerë 1.82 miliardë lekë, që sipas VKM nr. 302/2022 duhet t’i kalojnë shoqërisë Ujësjellës Kanalizime. Bashkia tregon se procedura është “në proces”, ndaj vlera “vazhdon të figurojë në pasqyrat financiare të Bashkisë”.
Asete të dëmtuara me vlerë 27.8 milionë lekë, përfshirë 16 automjete dhe pajisje kompjuterike, nuk janë shitur. Sipas raportit, nuk është ngritur komision “për asgjësimin dhe vlerësimin si skrap, me qëllim shitjen për realizimin e të ardhurave”. Asetet nuk janë rivlerësuar nga ekspertë të licencuar dhe vazhdojnë të regjistrohen me kosto historike.
Për katër prej rekomandimeve të mëparshme për aktivet, KLSH shkruan se “nga ana e Bashkisë Dibër nuk është marrë asnjë masë për zbatimin e këtij rekomandimi”. Nga 13 masa organizative të ri-kërkuara, vetëm 1 është zbatuar dhe 12 janë në proces. Bashkia nuk ka kthyer përgjigje as brenda afateve të KLSH-së, 20 ditë dhe 6 muaj.
KLSH i kërkon bashkisë inventarizim fizik të të gjitha aktiveve afatgjata dhe sistemimin e llogarive “me mbylljen e pasqyrave financiare viti 2026”.
