Shqipëria dhe Maqedonia e veriut nisin zyrtarisht bisedimet për anëtarësim në Bashkimin Evropian

548
Foto ilustruese nga interneti

Shqipëria dhe Maqedonia e Veriut kanë nisur zyrtarisht negociatat për anëtarësimin në Bashkimin Evropian. Në konferencat e përbashkëta është vlerësuar puna e bërë, derisa është thënë se Shqipërinë dhe Maqedoninë e Veriut e pret një rrugë e re e reformave që duhet bërë e po ashtu një varg përfitimesh nga BE-ja.

Me hapjen e negociatave për anëtarësim me Bashkimin Evropian, Shqipëria është një hap larg anëtarësimit në BE.

Së bashku me Shqipërinë, këtë rrugëtim e nisi edhe Maqedonia e Veriut.

Para mbajtjes së konferencës së parë ndërqeveritare, përfaqësuesit evropianë meritat ia atribuuan popujve të të dyja shteteve.

“Do të ketë një rritje të investime, do të ketë bashkëpunime në fusha kyçe si energjia dhe transporti, ju do të maksimizoni impaktin e fondeve të BE që do të thotë punësime të reja, mundësi të reja dhe pikërisht për këtë kanë pritur kaq gjatë qytetarët e juaj, kanë punuar kaq shumë dhe që e meritojnë”, ka thënë Ursula von der Leyen, presidente e Komisionit Evropian.

“Në Evropën e sotme ne duhet të jemi bashkë gjatë gjithë kohës. Çekia e ka mbështetur anëtarësimin e Ballkanit Perëndimor dhe do të vazhdojë të jetë e tillë”, është shprehur kryeministri i Çekisë, Petr Fiala.

Premtime se do të ndërtojnë shtete demokratike e evropiane dhanë liderët e Shqipërisë e Maqedonisë së Veriut.

“Shumë faleminderit popullit i cili kurrë nuk u dorëzua dhe kurrë nuk rreshti për ndjekjen e rrugëtimit evropian dhe qëndruan të fortë pas tre vitesh shumë të ndërlikuara ku refuzimet nga Këshilli i Evropës dhe tërmeti, pandemia, lufta në anën tjetër krijuan një situatë vërtetë të vështirë, por na forcuan më shumë se që ishim”, ka thënë kryeministri i Shqipërisë, Edi Rama.

“Besoj që ky fillim i ri për rajonin do të jetë begati dhe progres dhe ku ka progres në një vend kjo do të nxisë progresin te fqinjët e tjerë. Ne do të vijojmë me të njëjtën dinamikë të bashkëpunimit rajonal dhe aktualisht do të vijojmë siç kemi bërë deri tash në mënyrë të shkëlqyeshme, në interesin e qytetarëve tanë”, ka thënë kryeministri i Maqedonisë së Veriut, Dimitar Kovaçevski.

Hapja e negociatave për anëtarësimin e Shqipërisë e Maqedonisë, sipas përfaqësuesit të lartë të BE-së, është mesazh edhe për shtetet e tjera të Ballkanit Perëndimor.

“Duke filluar procesin e negociatave Shqipëria do të bëhet anëtare e BE-së dhe me këtë Shqipëri, BE-ja po merr një hap të rëndësishëm të plotësimit të vet. Ballkani Perëndimor është tej mase i rëndësishëm për BE-në dhe ky është një moment në të cilën kjo rëndësi po tregohet”, ka thënë Josep Borrell.

Atë se çfarë po ndodhte tha se vështirë po e beson kryeministri Edi Rama.

Në konferencën ndërqeveritare, Rama tha se nuk ka rrugë tjetër përveç BE-së.

“Është e vështirë të besoj se kjo po ndodhë. Për mjaft kohë ne luftuam kundër besimit se nuk do të ndodhte fare, megjithatë të hiqnim dorë nuk na ka shkuar kurrë në mendje. Ju e dini të gjithë shumë mirë se në Shqipëri nuk jemi dakord pothuajse për gjithçka por ka një besim që i mbijeton të gjitha mosmarrëveshjeve tona. Nuk ka rrugë tjetër përveç Bashkimit Evropian”, ka deklaruar Rama.

Hapja e negociatave për Shqipërinë dhe Maqedoninë e Veriut është mirëpritur nga liderë të tjerë evropianë e rajonalë.

Biden: Hapja e negociatave për Shqipërinë e Maqedoninë, t’i frymëzojë shtetet e tjera të Ballkanit

Reagime të shumta ka nxitur hapi i bërë nga BE-ja drejt anëtarësimit të Shqipërisë dhe Maqedonisë së Veriut. Liderë të shumtë kanë uruar shtetet për punën e bërë, e kanë bërë thirrje për zgjerim të mëtutjeshëm të BE-së. E vetë BE-ja ka premtuar se do të punojë në zgjerimin e saj me shtetet e Ballkanit Perëndimor.

Urime të shumta kanë marrë Shqipëria dhe Maqedonia e Veriut pas nisjes së negociatave për anëtarësim në Bashkimin Evropian.

Në një deklarim të përcjellë nga Shtëpia e Bardhë, presidenti Joe Biden ka mirëpritur hapin e ndërmarrë nga BE-ja.

Sipas Biden hapja e negociatave për Shqipërinë e Maqedoninë duhet t’i frymëzojë shtetet e tjera, që synojnë të jenë pjesë e BE-së.

“Në një moment kur Rusia ka shkatërruar paqen në Evropë, është më e rëndësishme se kurrë ta mbështesim aspiratën për një Evropë të plotë, të lirë dhe në paqe. Një Ballkan Perëndimor demokratik, i sigurt dhe i begatë mbetet thelbësor për këtë vizion. Shtetet e Bashkuara do të vazhdojnë të jenë një partner i fortë dhe i besueshëm ndërsa ato vende punojnë për t’i mbrojtur të drejtat e njeriut, për t’i forcuar reformat demokratike dhe për ta mbështetur sundimin e ligjit”, ka thënë Bideni.

Rrugëtimi i Shqipërisë dhe Maqedonisë së Veriut drejt BE-së, ka qenë i gjatë e sfidues ka thënë presidenti i Këshillit Evropian.

Charles Mishell, ka premtuar se BE-ja do të fokusohet në procesin e zgjerimit.

“Në takimin e liderëve të BE-së e të Ballkanit Perëndimor, ne vendosëm të injektojmë një dinamikë të re dhe një vendosmëri të re për të ecur përpara së bashku. Ne do të avancojmë më tej integrimin gradual të BE-së dhe rajonit, tashmë gjatë procesit të zgjerimit. Ballkani Perëndimor i përket BE-së dhe ne duhet ta bëjmë këtë të ndodhë”, ka thënë presidenti i Këshillit Evropian.

Përshëndetjen e hapit të ndërmarrë nga BE-ja presidentja Vjosa Osmani e ka shoqëruar me një kërkesë për vendet anëtare.

“Në këtë kohë vendimtare, përshpejtimi i procesit të zgjerimit për vendet demokratike të Ballkanit Perëndimor është një domosdoshmëri! Ne u bëjmë thirrje vendeve anëtare të BE-së, që ta marrin urgjentisht vendimin e vonuar për liberalizimin e vizave për qytetarët tanë”, ka thënë Osmani.

Kurse kryeministri Albin Kurti, ka shprehur gatishmërinë për t’iu bashkuar Shqipërisë dhe Maqedonisë së veriut në reformat që do t’i ndërmarrin.

“Kosova feston arritjet tuaja historike dhe bashkohet me angazhimin tuaj drejt reformave, që do të transformojnë vendet tuaja dhe do të forcojnë rajonin dhe Evropën tonë”, ka deklaruar Kurti.

Lajm të shumëpritur e të mrekullueshëm e ka konsideruar Serbia, hapjen e negociatave për anëtarësimin e Shqipërisë dhe Maqedonisë së Veriut në BE.

“Lajm i mrekullueshëm, i shumëpritur për fqinjët tanë, miqtë dhe partnerët e Ballkanit të Hapur; Maqedonia e Veriut dhe Shqipëria kanë filluar bisedimet për anëtarësim në BE. Llogaritni në bashkëpunimin tonë të përzemërt, për të punuar drejt së ardhmes sonë të përbashkët brenda familjes së BE-së”, thuhet në reagimin e MPJ-së së Serbisë.

Të martën, me të mbajtur konferencat ndërqeveritare, Shqipëria dhe Maqedonia e Veriut, bënë edhe një hap para anëtarësimit në Bashkimin Evropian.