Rruga e Arbërit, vetëm një kompani paraqet ofertë për ndërtimin e saj

446
Një nga segmentet e rrugës së Arbërit. Foto: Bulqizaime.al

Vetëm një kompani shqiptare përgjatë një muaji ka shprehur interes për konçensionin e ndërtimit dhe mirëmbajtjes së rrugës së Arbërit.

Kompania “Gjoka Konstruksion” ka bërë studimin e fizibilitetit dhe ka dorëzuar edhe një ofertë pranë qeverisë për të marrë përsipër përfundimin e kësaj vepre, duke u shpërblyer me 10% të pikëve bonus në tender.

Burime pranë Ministrisë së Transporteve thanë se ofertat do të hapen në datën 2 tetor dhe se fituesi do të shpallet brenda muajit, transmetoi tv Klan.

Qeveria ka shpërndarë pranë kompanive parametrat teknikë që do të ketë rruga, duke çuar shpejtësinë 60 deri në 100 km/h. Gjatësia e segmentit do të jetë 69 kilometra.

Në këtë aks është projektuar të ndërtohet vetëm një tunel 3.2 kilometër dhe do të shtohet numri i urave lidhëse.

Pas dy varinatesh që u propozuan fillimisht, në tender është vendosur si kusht që kompania fituese nuk do të marre taksë për rrugën, por pagesën për mirëmbajtjen do ta negociojë me shtetin.

Qeveria nuk do të pranojë oferta më të mëdha se 250 milionë euro, ndërsa kusht tjetër është që 190 milionë të kësaj vepre t’i japë ndërtuesi dhe 60 shteti.

Në kohën që rruga do të përfundojë, kompania do të marrë me këste paratë nga buxheti. Vepra parashikohet të përfundojë brenda 4 vitesh.