Kryetari i LSI-së, Ilir Meta shprehu mesazhe të qarta kundër Kryeministrit Edi Rama për sa i përket drogës dhe krimit të organizuar në vend.
“Të gjithë ne kërkojmë një Shqipëri pa drogë që përfaqëson qytetarët dhe jo krimin e organizuar që përmes monopoleve, ekraneve të kapura dhe koncesioneve po ndalojnë sipërmarrjen në vend. Kjo është koha juaj e të rinjve dhe të rejave. Lum kush e dëgjon zërin e tyre, ne kurrë nuk mund të lejojnë që zgjedhjet e lira të bëhen kurban në këtë vend. Shqipëria nuk do të jetë një one-man shoë por një shans për të gjithë,” tha Meta.
Meta i bëri thirrje Ramës e Bashës që të mos mbajnë peng të ardhmen e vendit me “arrogancën” e “kokëfortësinë” e tyre.
“Çdo politikan mund të jetë peng i të kaluarës së tij, por kjo asnjëherë nuk mund të jetë një fatkeqësi për vendin e çdo politikani. E ardhmja e vendit nuk mund të merret peng nga askush që mendon më shumë për karrigen dhe pushtetin e tij se sa për paqen dhe stabilitetin e vendit të tij dhe qytetarëve të tij. Ndaj nuk kemi asnjë minutë për të humbur as me arrogancën e njërës palë, as për ultimatumet e palës tjetër për t’i dhënë Shqipërisë zgjedhje të pranuara nga të gjithë. Nuk na dhimbsen as karriget tona, as të Ilir Metës as të ministrave të LSI-së për t’i dhënë zgjidhje Shqipërisë e për të mos u bërë turpi i Europës në vitin 2017. Të mos pengohet nga arroganca dhe kokëfortësia që vetëm vonon Shqipërinë të jetë vend normal” tha Meta.
Meta ishte i pranishëm sot në një takim me të rinjtë e kësaj partie në pallatin e sportit “Asllan Rusi”.
