GJKKO cakton masën ‘arrest me burg’ për ish-drejtorin e IKMT Dibër, Lutfi Miftari

289
Gjykata e Posaçme për Korrupsionin dhe Krimin e Organizuar

Gjykata e Posaçme për Korrupsionin dhe Krimin e Organizuar ka caktuar masën e sigurisë arrest me burg për drejtorin e IKMT Dibër, Lutfi Miftari dhe Eljo Elezin, administrator i një kompanie minerare.

Miftari dhe Elezi u arrestuan me urdhër të SPAK të premten pasi administratori i kompanisë “H4 CHROM” dyshohet se i ka dhënë 50 mijë lekë të reja drejtorit të IKMT-së Dibër në këmbim që ky mos të fillonte procedurën për shkeljen e konstatuar tek ky subjekt.

Një grup kontrolli i IKMT kishte konstatuar se kompanisë i mungonte leja mjedisore dhe dokumente të tjera sipas policisë.

Pas arrestimit, policia gjeti sekuestroi në banesën e Miftarit 29.500 euro, 1,300 dollarë dhe 89, 600 lekë. Dy të arrestuarit akuzohen për “Korrupsion pasiv i personave që ushtrojnë funksione publike” dhe “Korrupsioni aktiv i personave që ushtrojnë funksione publike”.

Miftari më parë ka mbajtur detyrën e drejtorit të Shërbimit Pyjor në Bashkinë e Bulqizës.