Një 50-vjeçar nga fshati Fshat, Klos është proceduar penalisht për dëmtimin e monumentit të kulturës “Ura e Vashës” si edhe ndërtime të tjera të paligjshme në atë zonë.
Sipas njoftimit të Drejtorisë Vendore të Policisë Dibër, specialistët për Hetimin e Krimeve në Komisariatin e Policisë Mat kanë referuar materialet në Prokurori dhe kanë nisur procedimin penal ndaj shtetasit F. S., i dyshuar për veprat penale “Shkatërrimi i veprave kulturore”, “Shpërdorimi i tokës” dhe “Ndërtimi i paligjshëm”.
Hetimet paraprake tregojnë se ky person ka ndërhyrë në mënyrë të paligjshme pranë monumentit të kulturës “Ura e Vashës”, ku dyshohet se ka kryer gërmime, spostime të inerteve dhe ndërtim objekti pa leje ndërtimi.
Reagimi i Policisë vjen pas publikimit të rastit në emisionin investigativ “STOP” në Tv Klan, ku u denoncuan dëmet e shkaktuara pranë urës historike. Pamjet dhe dëshmitë e transmetuara nxorën në pah ndërhyrjet me mjete të rënda në zonën përreth monumentit dhe mungesën e ndërhyrjes nga institucionet përgjegjëse për mbrojtjen e trashëgimisë.
Prej më shumë se dy vitesh në afërsi të urës janë kryer punime për ndërtimin e një lokali, ndërsa janë gërryer me eskavator skarpatet dhe shtrati i lumit Mat për krijimin e një vendparkimi, duke dëmtuar strukturën dhe territorin përreth monumentit. Edhe pse vetëm 1 km larg nga rruga e Arbërit, nuk ka pasur asnjë ndërhyrje prej institucioneve përgjegjëse: përfshirë, IKMT-në e Dibrës, Inspektoratin Vendor të Mbrojtjes së Territorit në Bashkinë Klos dhe strukturat përkatëse të Policisë Vendore.
Ura e Vashës, e ndërtuar mbi lumin Mat mes fshatit Fshat dhe Guri i Bardhë në Klos, daton nga fillimi i shekullit XVIII dhe është një nga urat më të vjetra të zonës. Fillimisht e njohur si “Ura e Skurës”, ajo mban statusin “monument kulture” dhe përfaqëson një vlerë historike dhe arkitektonike të rrallë.
Materialet procedurale janë referuar Prokurorisë pranë Gjykatës së Shkallës së Parë të Juridiksionit të Përgjithshëm Dibër për vijimin e hetimeve dhe marrjen e masave të nevojshme ligjore.
